جدید پنجابی شاعری
چیتر موسم باگے وچ کنڈیالی شکلے لتھا
بندہ بندہ جھردا جاوے ایسے صدمے لتھا
کیہ لینا ایں پچھ کے اوہنوں کیس بہانے لتھا
اک نِما جیہا ہاسا جیہڑا اوہدے مکھڑے لتھا
خورے کیدے سیک نیں ساڈا تن من کولے کیتا
خورے کون پہاڑاں اتوں شخر دوپہرے لتھا
ماں دے نال مدھانی دی او واج کدوکی ٹُر گئی
نہ چہکار کدے چڑیاں دا فجرے فجرے لتھا
جنوں ویکھو اوہدیاں سوچاں بھمبل بھوسے پئیاں
جنوں ویکھو اوہ ای ایتھے کسے بھلیکھے لتھا
تیرے باجھوں اپنی جوہ وی انج ای ٹُریا پھرناں
جسراں کوئی دیس پرائے رات براتے لتھا
فر ادھ موئی روحے قسمے جیون کھڑدا جاپے
فیر کسے دا ہاسا اندر سہجے سہجے لتھا
خورے کل دا سورج اس وستی نوں کرناں ونڈے
نیرے دے وچ پھردا ہر کوئی ایسے آسے لتھا
پیو دے بعد کسے نہ پُچھیا موہڈے تے ہتھ رکھ کے
پُترا! اج کل پِھرناں ایں تُوں کہڑی سوچے لتھا
خورے کیہڑی خُونی رُتے اکھر بِھجی جاون
خورے کیہڑا درد اساڈے مصرعے مصرعے لتھا
اوتھے دُکھ ونڈاون والا نظر نہ آوے کوئی
جتھے ہر کوئی پِھردا آپو اپنی غرضے لتھا
ہُن ایہ سکھنا ٹیشن دل دا مُک گئے رونق میلے
او انبھول جیہا گڈی چوں کہڑے ویلے لتھا
دُوروں اُٹھدا ساڑ جیہا نت اکھاں نوں اگ لاوے
اس نگری وچ سرمد کیہ اے اندر کھاتے لتھا
محبوب سرمد
No comments:
Post a Comment
Note: only a member of this blog may post a comment.