جدید پنجابی شاعری
ہولے ہتھ نہ ویراں دے نیں
رانجھے قاتل ہیراں دے نیں
لمی واٹ ہنیرے دی اے
ڈونگھے پندھ جگیراں دے نیں
ہڈاں وچ نیں گجھیاں سٹاں
کدھرے موہرے نیراں دے نیں
کدھرے لٹ ملانے دی اے
کدھرے دھوکھے پیراں دے نیں
چارے پاسے بند نیں راہواں
کھلے در تفسیراں دے نیں
دکھ سوہاگے جوئی پھردے
گنھے جھٹ کریراں دے نیں
سوچاں لتاں توڑی جاون
لمے کوہ تقدیراں دے نیں
ہتھاں وچ لکیراں نیں پر
بنھے ہتھ لکیراں دے نیں
ساۓ نیں کجھ بھوندے پھردے
بلدے شوق سریراں دے نیں
گجھے دکھ تماشا بن گئے
سوکھے جھٹ مشیراں دے نیں
دل تے دکھ جھریٹاں مارن
ونھے بول کسیراں دے نیں
سفنے سڑ کے کولا ہو گئے
مندے حال تعبیراں دے نیں
میرا دل دربار پھلاں دا
سوچاں مچ فقیراں دے نیں
صفدر ڈوگر
No comments:
Post a Comment
Note: only a member of this blog may post a comment.