جدید پنجابی شاعری
او یعقوبؑ جائی تے میں علیؑ جائی
او بھی شان والی میں بھی شان والی
میں حسینؑ دی بہن سدان والی
او یوسفؑ دی بہن سدان والی
میرا نام زینبؑ کربلا والی
اوہدا نام زینبؑ کنعان والی
سٗتی رہی اوہ ویر دے ٹٗرن ویلے
تے اوہ جاگدی رہی ارمان والی
گیا سیر نٗوں گھروں بھرا اوہدا
آپوں پرت گئی پچھان پرتان والی
ٹٗریا کربلا ول بھرا میرا
تے میں نال ہی ساتھ لدان والی
باپ اوس دا درد ونڈاندا سی
تے اوہ باپ دے درد ونڈان والی
میرا باپ بھی نہیں تے میں دُکھی زینبؑ
وڈے دُکھاں دے بھار اُٹھان والی
روندی رہی او گھراں وچ بیٹھ پردے
قدم اک نہ بُوہے تھیں چان والی
میں پردیسن مسافر بے وطن زینبؑ
کربلا جنگل خیمے لان والی
اوہنوں ملیا مُڑ مصر دا شاہ یوسف
ہس رس مبارکاں پان والی
میرا تکدیاں باغ ویران ہویا
کر کے صبر میں نام دھیان والی
گئی مصر نوں بیٹھ عماریاں تے
زریں زیور پوشاک لگان والی
سینہ چاک میں خاک پوشاک پا کے
قیدی ہو کے شام نوں جان والی
اوہدے ویر باراں سُکھاں وچ وسن
ویکھ ویکھ کے خُوشی منان والی
میرا لکھاں تھیں ودھ حسینؑ اکو
اوہ بھی کربلا وچ کھڑان والی
اوہدے ویر بلا پروار مصرے
سوہنی گھڑی ڈٹھی آن بان والی
میرے ویر کٗھوہایا پروار سارا
رکھی لاج ایمان قرآن والی
اوہ آباد آزاد تے شاد زینبؑ
تے میں سو سو ٹھوکراں کھان والی
جے اوہ زینبؑ اے کنعان والی
میں ہاں آفتاب دو جہان والی
سوں گئے اوسدے جاگدے پھٹ سارے
میں ہاں سُتے ہوئے پھٹ جگان والی
او راحیل جائی تے میں علیؑ جائی
دائم مصطفائیؐ خاندان والی
دائم اقبال دائم
No comments:
Post a Comment
Note: only a member of this blog may post a comment.