جدید پنجابی شاعری/ گیت
اج نہیں تے کل نوں ستاوے گی
چناں ساڈی یاد بڑی آوے گی
موسماں دی اکھ جدوں کُھلے گی
سِلی سِلی واء جدوں گُھلے گی
اکھ تیری بدو بدی ڈُلھے گی
نیند تیری اُڈ پُڈ جاوے گی
چناں ساڈی یاد بڑی آوے گی
٭٭٭٭٭
کیہڑا تیرے نخرے اٹھاوے گا
ساڈے وانگوں کیہڑا تینوں چاہوے گا
فیر تینوں چیتا ساڈا آوے گا
ویلے دی گراری گُھم جاوے گی
چناں ساڈی یاد بڑی آوے گی
٭٭٭٭٭
بُھل گیائیں راتاں وی گُزاریاں
انج نہیوں ٹُٹدیاں یاریاں
لتھیاں جاں تیریاں خماریاں
ہجراں دی کونج کُرلاوے گی
چناں ساڈی یاد بڑی آوے گی
٭٭٭٭٭
دِتیاں تُوں ڈھیر سزاواں نیں
ساڈے ولوں فیر وی دعاواں نیں
تینوں سب معاف خطاواں نیں
لنگھ گئی اے کجھ، لنگھ جاوے گی
چناں ساڈی یاد بڑی آوے گی
چناں ساڈی یاد ٭٭٭٭٭
زاہد صدیقی
No comments:
Post a Comment
Note: only a member of this blog may post a comment.