اوچ نیچ پھر کیوں اے جیکر سبھ دا دیون ہار اے اکو

 جدید پنجابی شاعری

اوچ نیچ پھر کیوں اے جیکر، سبھ دا دیون ہار اے اکو 

داتا دا دربار اے اکو،.. اوہ سچی سرکار اے اکو

اک نوں لگے ہاسیاں ورگی، اک نوں ہاواں ورگی لگے

دل دا موسم اپنا اپنا، گھنگھروں دی چھنکار اے اکو

اس دے پیار دی تانگھ نے میتھوں، پیارکرایا ہر بندے نوں

ونڈ چھڈیا جس نوں ناواں وچ، جےسوچو تاں پیار اے اکو

جھوٹھ، فریب، غریبی سارے، لٹن مارن دے قصے ہن

سرناویں وکھرے وکھرے نے، باقی دا اخبار اے اکو

میں کوئی بھیس وٹایا کیوں نہ، جھوٹھ تے پردہ پایا کیوں نہ

لوکیں میتھوں ڈردے ہالہ!، میرا اندر باہر اے اکو 

عالیہ بخاری ہالہ