جدید پنجابی شاعری
مترئیا پتر
میں چوہڑا، بھنگی، پلیت
سکیاں توں وی پہلوں جمیا دھرتی دا مترئیا پتر
نکے ہوندیاں سکول دے نلکے توں پانی پیتا سی
شکایت لگی تے میرے حصے دو چپیڑاں آئیاں
اوسے دن توں ڈر میرے اندر چوکڑی مار کے بہہ گیا
گرمیاں چ تریہہ نوں گُھٹ لینا واں
بھاویں ٹھنڈے، مٹھے پانی دا کولر مینوں واجاں ماردا رہووے
بوجھی چ پیساں دے ہوندیاں وی بھکھ مار لینا واں
پنڈ دے تندور تے روٹی سالن پا کے میرے ہتھ تے رکھ دتی جاندی اے
پر میرے دتے پیسے چاچا بوٹا پاک کرن توں بغیر ای غلے چ پا لیندا اے
میں چوہڑا، بھنگی، پلیت
باراں جماعتاں پڑھن تے میری ماں میرے نائب قاصد بنن دے سفنے ویکھے
درخواست دتی تے افسر آکھیا ایہہ سیٹ تہاڈی نہیں، خاکروب لئی اپلائی کر
تے میں بھجیاں اکھاں نال دوجی درخواست لکھ دتی
ہن میں سرکاری ملازم آں
میں چوہڑا، بھنگی، پلیت
صفائی کردا واں، پلیت آں غلاظت کھلارن والے پاک
میں روز مردا واں، ہن تے مرن دی عادت پے گئی اے
پر اج تے سچی مر گیا واں
اج سرگودھے میرا متر فیصل گٹر چ ڈب کے مر گیا اے
پاکاں دی پلیتی نال لبڑی لاش میرے ساہویں اے
اج میں سچی مر گیا واں
میں چوہڑا، بھنگی، پلیت
طاہرہ سرا
No comments:
Post a Comment
Note: only a member of this blog may post a comment.