جدید پنجابی شاعری
اج وی سن سنتالی اے
اج وی اوہیو رونے دھونے
اج وی اویں دُکھ
اج وی لوڑاں لُڈیاں پاون
اج وی نچدی بُھکھ
اج وی ظلم انھیری گُھلے
اج وی انبر لال
اج وی کھوہواں اندر سُٹن
ماواں اپنے بال
اج وی اکھاں ساہویں کُسدی
ویراں دی اک بھین
اج وی ساڈے پِچھے پِچھے
حِرصاں والی ڈین
اج وی سورج ہوکے بھردا
اج وی چن تے لاس
اج وی اِلاں وانگوں ٹُنڈدے
ویر ویراں دا ماس
اج وی چھویاں ٹکّوے بیبا
اج وی سوٹے ڈانگ
اج وی بمباں کولوں ڈر کے
دیندے نئیں اسیں بانگ
چاننے اجے وی پُھٹیا نہیں اے
رات اجے وی کالی اے
اج وی کہڑا سُکھ اے سانوں
اج وی سن سنتالی
ارشاد سندھو
47 = سنتالی
No comments:
Post a Comment
Note: only a member of this blog may post a comment.