جدید پنجابی شاعری
بے رنگیاں تصویراں ہتھیں آ گئے آں
لگدا اے تقدیراں ہتھیں آ گئے آں
فیر کِسے نے بھن دِتا اے تیراں نوں
فیر کِسے دے ویراں ہتھیں آ گئے آں
پچھلی وار وی ڈنگیا سی تقریراں نے
مُڑ کے فِر تقریراں ہتھیں آ گئے آں
اکھراں دی اگ جُھگے ساڑن لگ پئی اے
کِنج دیاں تحریراں ہتھیں آ گئے آں
وڈھی گئے آں مُڑ مُڑ پِپل بوڑھاں نوں
تاں تے جنڈ کریراں ہتھیں آں گئے آں
حالاں تے اک سُفنا وی نہیں تکیا سی
پہلاں ای تعبیراں ہتھیں آگئے آں
نسدے نسدے سندھو جی تنگ ذہناں توں
کالے کٹ ضمیراں ہتھیں آ گئے آں
ارشاد سندھو
No comments:
Post a Comment
Note: only a member of this blog may post a comment.