جدید پنجابی سرائیکی شاعری
جیڑھے رستے توں وی گزریا قافلہ شبیرؑ دا
ہر قدم بنڑدا گیا مینار ہک تنویر دا
کربلا دی ریت تے سجدے اجاں وی ثبت ہن
مشعل بن تے پیا چمکدے خون بے تقصیر دا
خون دے دریا دے وچ بولھیاں مریندا رہ گیا
کھل تے پورا کر ڈتس ہر فیصلہ تقدیر دا
ڈے ڈتے عونؑ و محمدؑ، قاسمؑ و اکبرؑ تمام
سہہ گیا صدمہ غضنفر جہیں وفا دے میر دا
کربلا دے مارو بن کوں جو معلیٰ کر گیا
اے ہا تحفہ حلقِ اصغرؑؑ توں نکھتے کھیر دا
سارا گھر دا گھر لٹا کے بن گیا ذبح عظیم
خوابِ ابراہیم کوں جامہ ڈتس تعبیر دا
بوسہ گاہِ مصطفیٰؐ تے جاں چلائے خنجر شمر
ڈھہ پیا سر دے اتوں بوچھن ڈُکھی ہمشیر دا
چڑھ گیا قرآن ناطق سانگ دے ممبر اتے
شام تو ݨیں درس ڈیندا رہ گیا تفسیر دا
ظلم دی حد مُک گئی ہئی شام دے بازار وچ
ورقہ ورقہ تھیا صحیفہ آیت تطہیر دا
رُل گیا باطل سفیرا کربلا دی خاک وچ
کر گیا اسلام زندہ پُتر خیبر گیر دا
سفیر لاشاری
No comments:
Post a Comment
Note: only a member of this blog may post a comment.