جدید پنجابی شاعری
آکڑ جے کر نکلی نہ اج تیرے وچوں
لیکھاں نے وی پھٹنا نئیوں نھیرے وچوں
جیہڑے ڈنڈی مار جاندے نیں اوکھے ویلے
کڈھ دے ایسے یاراں نوں توں گھیرے وچوں
میں چاہناں واں رل مل رہئیے ماپیاں دے لئی
کیوں نئیں مکدی تانگھ ملن دی میرے وچوں؟
جیہڑے راتیں اٹھ کے رب نال گلاں کردے
لاٹاں نکلن اوہناں دے پھر چہرے وچوں
راکھی جیہڑا کر نئیں سکدا، سجنو دے دو
اوس راکھے نوں دیس نکالا، ڈیرے وچوں
شرماں والے گُھنڈ وی لتھ گئے ویاواں اتے
اج کل ویکھو نوٹ وی مک گئے سہرے وچوں
اِلاں، کاواں گھیرا پایا، باغوں کڈھ لو
چڑیاں، توتے، تِتر، مور، بٹیرے، وچوں
گُھنے بن کے پھردے چار چفیرے تیرے
ہوندے نیں او تیز طرار بتھیرے وچوں
قاسم اوہناں گھٹا خیراں پاؤنیاں جیہڑے
ہو جاندے نیں سڑ سڑ دوہرے تہرے وچوں
قاسم سرویا
No comments:
Post a Comment
Note: only a member of this blog may post a comment.