عارفانہ کلام حمد نعت منقبت
وچ قرآن حضورﷺ دے بارے باتاں نیں
دوہڑے، ڈھولے، ماہیے، نالے نعتاں نیں
رب فرمایا والضحیٰ دا چہرہ اے
اس چہرے وجہُ اللہ اُتے سہرا اے
زُلفاں نیں واللیل کہ کالیاں راتاں نیں
قسم خدا نیں چائی نسبت سوہنے دی
تِین زیتون چہ ملدی عظمت سوہنے دی
دسیاں کل کائنات نوں ایویں چاہتاں نیں
شافعی کیتا حشر دا مولا ساجن نوں
کول بلا لیندا اے یار دے درشن نوں
یار نیں یار نوں بخشیاں انج سوغاتاں نیں
باغ بہشتاں بنیاں خوشیاں آ گئیاں
مُکیا پت جھڑ ویلہ بہاراں چھا گئیاں
جس دم کیتیاں عربی ماہی جھاتاں نیں
رب دا یارؐ پیارا سوہناؐ والفجری
آیا لے کے دنیا لئی اے خوشخبری
آیا شبیر ہے سوہناؐ لے کے نجاتاں نیں
شبیر حسین شبیر
No comments:
Post a Comment
Note: only a member of this blog may post a comment.