جدید پنجابی شاعری
زور اے کی تقدیراں نال
رُسیا ہتھ لکیراں نال
مرزا وِجھا تیراں نال
صاحباں رل گئی ویراں نال
دل ہو جاندے وانگ مسیت
ٹر کے ویکھ فقیراں نال
ملک چلایا جاندا اے؟
دسو بس تقریراں نال
کوڑ نہیں مردی لفظاں دی
جھلیا مٹھیاں کھیراں نال
ساری عمر ہنڈائی اے
تیریاں دو تصویراں نال
جے نہ ڈکیا قیدو نوں
اِنجے ہونی ہیراں نال
سوہنےؐ گل نال لایا اے
میریاں کل تقصیراں نال
لوکو جگ تے رب دی سوں
ہمت رونق ویراں نال
کنے انّھاں کیتا اے؟
اکھیاں نوں تعبیراں نال
خشبو قیدی نہیں ہونی
ظلم دیاں زنجیراں نال
دل ناسف دا ڈُلھیا اے
روندی اکھیوں نیراں نال
خبیب احمد ناسف
خبیب احمد کنجاہی
No comments:
Post a Comment
Note: only a member of this blog may post a comment.