جدید پنجابی شاعری
آس دا سورج نہیرے وچوں کڈھیا اے
چانن اک اک مصرعے وچوں کڈھیا اے
میرے تے ہن در در رلنا واجب اے
سجناں دل دے حجرے وچوں کڈھیا اے
کجھ احساناں تھلے نپیا ہویا ساں
اج میں خود نوں ملبے وچوں کڈھیا اے
اپنے وچ رہیا میں بھاویں بھورا نہیں
دس میں تینوں اپنے وچوں کڈھیا اے؟
تیرے لئی میں مسئلہ بنیا ہویا ساں
تاہیوں تینوں مسئلے وچوں کڈھیا اے
جسراں روح بدن چوں زین نکلدی اے
اوہنوں اسراں سینے وچوں کڈھیا اے
زین جٹ
No comments:
Post a Comment
Note: only a member of this blog may post a comment.