جدید پنجابی شاعری
ویلے ہتھوں پِیڑاں جردا جاندا اے
فیر وی دل تدبیراں کردا جاندا اے
دل تے مینہ ورہدا اے اوہدیاں یاداں دا
اکھیاں دے وِچ پانی بھردا جاندا اے
اوکھے ویلے کم نئیں آؤندا کوئی وی
"بندیاں چوں احساس ای مردا جاندا اے"
خورے اوہنوں لوڑ اے ہجر فراقاں دی
جیہڑا قُرب دی برف چہ ٹھردا جاندا اے
پَے کے ایویں ای ون سوَنّیاں سوچاں وِچ
بندہ عشق دی بازی ہردا جاندا اے
ہجر دے شُوکاں ماردے دریا وِچ جمال
کون اے جیہڑا ڈُبدا، تردا جاندا اے
جمال عبدالناصر
No comments:
Post a Comment
Note: only a member of this blog may post a comment.