جدید پنجابی شاعری
ہاواں بھر بھر دَسناں واں میں راز اپنا دیواروں نُوں
دل تے جو کُجھ بیت گئی اے دَسیا نئیں میں یاراں نوں
ہِجر دِیاں راہواں تے اوہنوں ہتھیں رُخصت کِیتا سی
ہُن کس منہ دے نال کہواں میں؛ سانول موڑ مُہاراں نوں
کل دی گل اے، باغاں دے وِچ ساوے پتّر نچدے سَن
سمجھ نئیں آؤندی کِس دُشمن دی لگ گئی نظر بہاراں نوں
شہر دے ظالم لوکی ایتھے عیب ودھا کے دَسدے نیں
لبھ جاوے جے خبر کوئی تے ڈَکّے کون اخباراں نوں
تتیاں ریتاں وِچ سڑدے تے ڈُب کے چناء وچ مردے نیں
خورے کیہ کجھ سہنا پیندا عشق دیاں بیماراں نوں
ایویں تے نئیں اکھاں وِچوں موتی ڈُلھ ڈُلھ جاندے نیں
بندہ رو ای پیندا اے جے کر سٹ پوے اتباراں نوں
جمال عبدالناصر
No comments:
Post a Comment
Note: only a member of this blog may post a comment.