جدید پنجابی شاعری
پہلے جاندے نئیں پے اَڑ کے بہہ گئے نیں
ہور نویں غم پلّہ پھڑ کے بہہ گئے نیں
سنگت ٹُٹ وی جاندی دل تے سمجھ گیا
پنج دریا پر اکھیں وڑ کے بہہ گئے نیں
سجن دوروں آئے آپ مِلن دے لئی
تے ہُن شاموں شامیں لڑ کے بہہ گئے نیں
جِنہاں آساں رکھیاں جھولی بھرن دِیاں
اوہدے در تے تڑکے، تڑکے بہہ گئے نیں
ہتھیں چڑھ گئی رہتل چندرے لوکاں دے
سُتھرے لوکیں اندر تڑ کے بہہ گئے نیں
پِنجرے نُوں گھر سمجھ لیا اے، پکھواں نیں
پر نئیں چھنڈے، تے بِن پھڑ کے بہہ گئے نیں
دُھوں پِھر گئے ہر دُشمن دے مُنہ ضامن جی
اپنے ساڑ اچ آپے سڑ کے بہہ گئے نیں
الطاف ضامن چیمہ
No comments:
Post a Comment
Note: only a member of this blog may post a comment.