جدید پنجابی شاعری
بھائیا، کانی ونڈ تے پے گئی
خیر اے تینوں ٹھنڈ تے پے گئی
توں جِتیا ایں ڈھیر ودھائیاں
ساڈی بُھنجے کنڈ تے پے گئی
بولیا غصے نال او بھاویں
کَناں دے وچ کھنڈ تے پے گئی
بھاویں پل دو پل او آیا
غیراں بوتھے چنڈ تے پے گئی
اگوں ہمت آپو اپنی
سِر تے بھاری پنڈ تے پے گئی
اوہنے غلطی من لئی اے پر
ساڈے دل تے گنڈھ تے پے گئی
تنہا عاجز نوں وڈیائی
لعنت یار گھمنڈ تے پے گئی
محمد عمران تنہا
No comments:
Post a Comment
Note: only a member of this blog may post a comment.