پنجابی عارفانہ کلام
ہنجواں دے ہار، پھُلاں دے گجرے بنا لواں
ذکرِ رسولِ پاکﷺ دی محفل سجا لواں
لگے نہ سیک دنیا دا اکھیاں دے نور نوں
چُم کے نبیؐ دے نام نوں اکھیاں تے لا لواں
رب دا گناہ گار جے کر لے نبیﷺ نوں یاد
رحمت کہوے حضورؐ دی؛ آ میں چھڑا لواں
اوتھے تے جند چھڑائے گی میرے توں موت وی
اک وار میں حضورﷺ دے روضے تے جا لواں
روضے نبیؐ دے گِرد گھُمدیا سوہنے کبوترا
جی چاہندا اے میں تینوں بیلی بنا لواں
ویخاں جے روضے پاک نوں اکھیاں نہ رجدیاں
جے ویخاں اپنے آپ نوں، نظراں جھُکا لواں
وچ قبر دے ظہوری تے نہ کرو اجے سوال
پہلے تے میں حضورﷺ نوں نعتاں سُنا لواں
محمد علی ظہوری
No comments:
Post a Comment
Note: only a member of this blog may post a comment.