جدید پنجابی شاعری
بابل
کہندے بابل ویہڑے دا رُکھ
بابل گُوڑھی چھاں ہوندا اے
بابل نال ہواواں ٹھنڈیاں
بابل کل جہاں ہوندا اے
رُکھ سدا نہیں رہندے ویہڑے
رُکھاں دا وی ویلا ہوندا
رُکھ وی وانگ مسافر ہوندے
چل چلی دا میلا ہوندا
چھاں کسے دے نال نہیں ٹُردی
چھانواں تھلے بہنا پیندا
چھانواں سر تے نہ ہوون تے
دُھپاں نوں وی سہنا پیندا
میرا بابل رُکھ تے نہیں سی
جس دی چھایا سنگ نہ آوے
جیہڑا دُھپاں دے وچ ساڑے
جیہڑا ٹُردا سنگ نہ آوے
میرا بابل وانگ فرشتے
میرے نال سدا اے وسدا
میرے مُکھ تے ویکھ کے ہاسے
نِمے نِمے ہاسے ہسدا
اوکھے پندھ حیاتی دے وِچ
اگے ودھ کے ہتھ پھڑاوے
میری راہ وِچ آؤن والے
کنڈے چُک چُک راہ بناوے
میرا بابل چھانواں وانگوں
وِچ انہیرے چھڈ نہ جاوے
نال میرے ہر ویلے ٹُردا
میرے گل وِچ باہواں پاوے
میرا بابل ہُن وی مینوں
آ کے روز صلاحواں دیوے
سُفنے دے وِچ آ کے راتیں
بُکل وِچ پناہواں دیوے
میرا بابل ہُن وی میرے
موڈھے اُتے ہتھ دھریندا
چوں کوئی رب دا خاص فرشتہ
بندیاں دا پربندھ کریندا
فہیم اسلم
No comments:
Post a Comment
Note: only a member of this blog may post a comment.