جدید پنجابی شاعری
گوڑھی چپ وچ مکھ دا چانن
نیلیاں اکھاں ڈاہڈی واہمن
سترنگ اوہدیاں پوراں دے وچ
جیہڑی میرے خواب دی ویرن
ویخدے ویخدے اک دوجے ول
کدی تے ایہہ تصویراں بولن
میرا دل توڑن توں پہلاں
ٹٹ جاوے تیرے ہتھ دا کنگن
سونا بھرے صندوقاں والے
گنجھلاں خاک دیاں پئے کھولن
نمی جہی ہنجواں دی بارش
سارے شہر چ ہو گئی تلکن
کنک ونی مٹیار تے ٹِبا
ترچھی اکھ چرواہے تکن
کالے کاں نوں ویخ ہنیرے
دو گورے ہتھ کنڈی کھولن
تنویر قاضی
No comments:
Post a Comment
Note: only a member of this blog may post a comment.