جدید پنجابی شاعری
میرے جے کردار تے شک اے
مینوں تیرے پیار تے شک اے
جتھے لوکیں چور توں ڈردے
اوتھوں دے سردار تے شک اے
وقتوں پہلے آ گئی جیہڑی
مینوں ایس بہار تے شک اے
ٹھیکری پہرا دے کے ویکھو
جے کر چوکیدار تے شک اے
تیرے ناں تے غزلاں کیہیاں
حالے وی اظہار تے شک اے
دُشمن تے نہیں بے اتباری
ایتھے سب نوں یار تے شک اے
اس دا حل نہ کوئی وی مریم
تینوں جے دلدار تے شک اے
آصفہ مریم
No comments:
Post a Comment
Note: only a member of this blog may post a comment.