جدید پنجابی شاعری
اُچے بُرج لہور دے
جتھے بلدے چار مشال
جس دھرتی لُوں لُوں جاگدا
جس رُوں رُوں وچ دھمال
جتھے لوکی ہسدے کھیڈدے
جتھے میلے سارا سال
جتھے راہ سبیلاں لگیاں
جتھے کربل، ماتم نال
جتھے کھیڈ میداناں سجدے
جتھے ڈھول دی تھاپ دی تال
جتھے گڈیاں رنگ اسمان تے
ڈھانگے لے کے، لُٹدے بال
جتھے تھیٹر ، منڈلی شوق دی
جتھے شاعر ، اوج کمال
جتھے کھابے، کل جہان دے
رج کھائیے ریجاں نال
کون ایس حسن دا ساڑیا
کیہڑا ویری ایس جمال
کِنوں لگدیاں بھیڑیاں رونقاں
تے کِنے نفرت رکھی پال
کیہڑا خُون دی ہولی کھیڈدا
ربا غارت کر اوہدی چال
ایتھے میلے لگن عشق دے
ایتھے چڑھن خوشیاں دے حال
اک بستی میاں میر دی
اک پاسے مادھو لال
اک پاسے داتا، برکتاں
اک پاسے شاہ جمال
اُچے بُرج لہور دے
جتھے بلدے چار مشال
طارق عزیز سے منسوب
No comments:
Post a Comment
Note: only a member of this blog may post a comment.