جدید پنجابی شاعری
ظلم دی حد اوس کیتی میں وی ڈولیا نئیں
بلیاں اتے لایا جندرا کھولیا نئیں
اپڑیں انکھ دی سُولی چڑھیا ہس ہس کے
اوس دے پیراں ہیٹھ میں سیس نوں رولیا نئیں
نظراں دے وچ رکھے پرکھ اندازے میں
تکڑی اتے بندہ کدی میں تولیا نئیں
عمراں لنگھیاں اس دے بول نئیں وسرے
جیہڑا پھٹ جگر تے لگا مولیا نئیں
اوس دے ظلم نہ کیتے ظاہر دنیا تے
اپڑاں درد کسے دے اگے پھولیا نئیں
ہو گئی نیل و نیل اجیہی سجنڑاں نے
کیہڑا زہر حیاتی اندر گھولیا نئیں
اوہدے باہجھ گزار لئی میں اوکھی سہی
جگ دا کوئی طعنڑاں مہنڑاں گولیا نئیں
اوکھی جان چھڈانڑیں اوس دیاں یاداں توں
جیہڑا مینوں بھلنڑ لگیاں ڈولیا نئیں
اصغر یاداں ساڑ سواہ ناں کر دیونڑ
ایہو سوچ کے دبی راکھ نوں پھولیا نئیں
مقصود اصغر ندیم
No comments:
Post a Comment
Note: only a member of this blog may post a comment.