جدید پنجابی شاعری
دل قبراں ورگا
دل قبراں ورگا اے
جتھے سُفنے مُردہ حالت وچ
تے سو گلاں دبیاں ہوئیاں نیں
جتھے ارماناں نوں دفنایا ہویا اے
جتھے مٹی وچ جذبے نپے ہوئے نیں
جتھے خاباں دی نگری نوں
موت جھولا جھلاندی پئی اے
جتھے ان کہیاں گلاں نیں
جتھے کوڑے سچ
تے مِٹھّے جھُوٹھ
مٹی دے اندر
دبّے پئے نیں
دل قبراں ورگا اے
جتھے دنیا دی واج تے آندی اے
پر دنیا تیکر
دل دی واج نہیں اپڑدی
دل تے کچی مٹی دی اک مُٹھ اے
پر دل اندر پکیاں قبراں نیں
منتظر بٹر
منتظر بٹالوی
No comments:
Post a Comment
Note: only a member of this blog may post a comment.