جدید پنجابی شاعری
لِیراں گل وِچ پا کے عُمر گُزاری اے
سچ دے دھکے کھا کے عمر گزاری اے
پھُلاں نالوں نازک اپنی جِندڑی نُوں
سُولاں وِچ پھسا کے عمر گزاری اے
وکھری گل اے فیر وی مینوں مِلیا نئیں
اپنا حق جتا کے عمر گزاری اے
وَیر، کرودھ تے پاپاں، نالے نفرت توں
پلّا اساں چُھڑا کے عمر گزاری اے
طعنے مہنے اپنیاں تے غیراں دے
جھولی دے وِچ پا کے عمر گزاری اے
مقبول شہزاد
No comments:
Post a Comment
Note: only a member of this blog may post a comment.