جدید پنجابی شاعری
داری دارا - دو کنجوس
اَپنے بُوہے آن اِک راتِیں آکھن لگا دارا
میں اَدھ واٹیوں پَرت کے آیاں دارئیے ڈردا مارا
پُھوکاں مار بُجھائیں چھیتی اِس دا لاٹ منارا
دِیوا بَلدا چَھڈ گیا میں بندہ بُھلّن ہارا
کرماں والیے ویکھیں کدھرے تیل نہ سَڑ جائے سارا
داری کیہا وے تُوں کیوں پایا گھاٹا ایڈا بھارا
سُکّے پھیرے بُوٹ گھسائے ایہ کِیہ کِیتوئی کارا
دارے آکھیا تُوں کِیہ جاتا ایڈا بھولا اے دارا
مینوں کِتّھے وار کھاندائے ننگے پَیر گزارا
کُچّھے مار کے جُتّی کِیتائے ننگے پَیر گزارا
شُوماں دی اِس جوڑی دا سی بوجھ زمِیں تے بھارا
ڈاہڈا چنگا کم اِک کر گئے مر گئے داری دارا
انور مسعود
No comments:
Post a Comment
Note: only a member of this blog may post a comment.