جدید پنجابی شاعری
سِک دی اگ وِچ پِنڈا سڑیا، تیرا وی تے میرا وی
اکھاں اندر ساون وسیا، تیرا وی تے میرا وی
جس دن دوہاں لڑدے لڑدے پُنیا سی ہک دُوجے نُوں
لوکاں اس دن اندر تکیا، تیرا وی تے میرا وی
اپنی چادر توں وی ودھ کے پیر پسارے دوہاں نے
جھُوٹے رُوپ نے جُھگا پٹیا، تیرا وی تے میرا وی
ویچ کے ہاسے کھیڈ کھڈونے، جیون دا مُل پایا سی
آخر خالی کاسہ بچیا، تیرا وی تے میرا وی
بُلہاں اُتے کِھڑدے ہاسے، فیر وی بالاں وانگوں دُکھ
اکھیاں وچوں لُک لُک ہسیا ، تیرا وی تے میرا وی
بُکل مار اناواں والی اپنی تھاں نہ چھڈی تے
وکھرا وکھرا رستہ ہویا، تیرا وی تے میرا وی
جیون دی اس دوڑ دے اندر دُھوڑاں انج اڈائیاں نیں
مٹیوں مٹی چہرہ ہویا، تیرا وی تے میرا وی
اس دن وعدے ٹُٹے سارے، جس دن مُکھ پرتایا تُوں
نالے ہر اک خاب سی مویا، تیرا وی تے میرا وی
فہیم اسلم
No comments:
Post a Comment
Note: only a member of this blog may post a comment.