جدید پنجابی شاعری
ایدھی مرحوم ہوراں لئی خراجِ عقیدت
میں سُنیا اے
لوکاں لئی جو قابلِ نفرت ہُندا سی
اوس بچے نُوں اگے ودھ کے
سینے دے نال لا لیندا سی
اپنا پُت بنا لیندا سی
میں سُنیا اے
فِرقہ فِرقہ کھیڈ کھیڈ کے
زخمی ہوئے لوکاں نُوں او
مذہب فِرقہ ذات کدی نہ پُچھدا سی
ملہماں ونڈدا ہُندا سی
میں سُنیا اے
بوری دے وِچ بنھی ہوئی
جد کوئی لاش لاوارث لبھدی
اوہدا وارث بن جاندا سی
اہنوں ہتھیں دفناندا سی
کیوں نا اج فیر بابا جی برسی اُتے
بابا جی دے مقصد نوں سب
پورا کرن دی کوشش کرئیے
نھیرے دے وچ ڈبیاں ہوئیاں کندھاں اُتے
اِک اِک دیوا بال کے دھرئیے
آؤ اج فیر اوہدے ناں دا
اِک اِک چنگا کم ای کرئیے
حکیم احمد نعیم ارشد
No comments:
Post a Comment
Note: only a member of this blog may post a comment.