جدید پنجابی شاعری
لکھ تو بتی بال بنیرے
جگنو وانگ تے نئیں بل سکدی
کہندے تتلی سوہنی ہندی
دھیاں نال تے نئیں رل سکدی
دھیاں ماں دے دل دی ٹھنڈک
دھیاں پیو دی اکھ دا تارا
دھیاں دے بن سنجا لگدا
اپنا گھر سارے دا سارا
بھاویں ویرے سو وری لڑدے
ایناں دے بن رہ نئیں سکدے
جان توں ودھ کے چاہندے نے او
اے گل ہور کے کہ نئیں سکدے
سارے جگ توں اوکھے بندے
دھیاں اگے ڈل جاندے نے
ایناں دے او ویکھ کے ہاسے
اپنے دکھڑے پل جاندے نے
لاڈ تے خوشیاں ونڈدے ونڈدے
اے ویلا تے آنا ہندا
سب دی اکھ وچ اتھرو چھڈ کے
اپنے کار تے جانا ہندا
ویہڑے چوں پھلاں دا بوٹا
ہتھ نال وڈنا سوکھا تے نئیں
بھاویں اگے ہون باغیچے
گھر نو چھڈنا سوکھا تے نئیں
اپنے گھر وچ جا کے لوکو
ہر غلطی تے ڈر جاندی اے
جیہڑے کم کدی کیتے نئیں سی
او وی ہس کے کر جاندی اے
اوکھی سوکھی سب دی سن کے
فر وی راضی وس لیندی اے
ماپے یاد جدوں وی اوندے
اتھرو سامبھ کے ہس لیندی اے
قسمت دے او ہتھے چڑھ کے
ہاسے کھیڈے پل گئیاں نے
لاڈاں دے وچ پلیاں دھیاں
ویکھ وے ربا رل گئیاں نے
جتھے وسدی خوشیاں ونڈدی
اپنے گھر دی رانی ہندی
مینو دسو پلیو لوکو
دھی وی کدی بگانی ہندی
زوہیب ارشد
No comments:
Post a Comment
Note: only a member of this blog may post a comment.