جدید پنجابی شاعری
ماڑی چنگی آکھن نُوں جی کردا اے
میری چُپ دا چِیکن نُوں جی کردا اے
چوکھے چِر توں جِسدے اَگے سِر سُٹیا
اوہدے اَگے بولن نُوں جی کردا اے
اک دُعا دے مُل تے مرنوں بعد مِرا
اَپنیاں اَکھاں ویچن نُوں جی کردا اے
پہلے کُن دا پَل تاں ویکھ نئیں سَکیا میں
اوڑک دا پَل ویکھن نُوں جی کردا اے
شِیشے سانویں فِر ہُن اکھاں سان کراں
مُڑ اک بازی کھیڈن نُوں جی کردا اے
سُنیا اے جے عِشق دو مُوئی ڈَنگے تے
چن دے چن ڈَنگ چکَّھن نُوں جی کردا اے
شہر اِچ رنگلا کَل دَس کے اوہ خُوش رہندا
نہ رُکدا نہ روکن نُوں جی کردا اے
بِین ہر ویلے ہَتھ وِچ رکھناں ضامن جی
ہر بندہ ہُن پرکھن نُوں جی کردا اے
الطاف ضامن چیمہ
No comments:
Post a Comment
Note: only a member of this blog may post a comment.