جدید پنجابی شاعری
منجیاں نسریاں تے تیرے ہاسے چیتے آئے
ستھر کھبڑیاں تے تیرے ہاسے چیتے آئے
چیتر چڑھیا انج لگا ایہ دھرتی خوشی منائی
ولاں پنگریاں تے تیرے ہاسے چیتے آئے
خواب چ راتیں پھلاں نے سی دھکا مکی کیتی
اکھاں اگھڑیاں تے تیرے ہاسے چیتے آئے
ورہیاں پچھوں کٹھے ہوئے بھتا کھان بیٹھے
ٹاپاں چوپڑیاں تے تیرے ہاسے چیتے آئے
واڑے دے وچ بھیتو بھیتی ذکر تیرا سی ہویا
چبڑ کھکھڑیاں تے تیرے ہاسے چیتے آئے
شگناں والا دن سی آیا دھدوں گھٹی ویلے
آ ڈیناں چمبڑیاں تے تیرے ہاسے چیتے آئے
اج اچانک قلزم میرے ہتھوں سی کجھ ڈگا
چیزاں کھلریاں تے تیرے ہاسے چیتے آئے
عدنان قلزم رانجھا
No comments:
Post a Comment
Note: only a member of this blog may post a comment.