سنڑوں میں ڈسیندا ہا ماں میڈی کیا ہے

 جدید پنجابی ملتانی کلام 

ماں

سنڑوں میں ڈسیندا ہا ماں میڈی کیا ہے 

میڈی اِبتداء ہے میڈی اِنتہاء ہے 

مِری ماں ہے سچی بہوں بھولی بھولی

گھاگھوٹی دے واکوں میڈی ماں دی جھولی 

زمانے دی کھا کے او نفرت دی گولی

سکھیں دی رہی ساکوں اُلفت دی بولی

مِرے واسطے ماں خدا دی عطا ہے 

اگر میں ہاں پُھل ماں مِری گُلستاں ہے

دُعاواں تُوں جیندی میڈی رُت جواں ہے 

میں چن چوڈھویں دا تا ماں آسماں ہے 

میں ہاں نقطۂ رنگ ماں کہکشاں ہے 

نمازی ہاں میں تاں او کعبے دی جا ہے

سنڑوں مرتضیٰ توں قصیدۂ مادر

صدف ہے مِری ماں اے لعل اوناں دا گوہر

میں ہاں کارواں تاں مِری ماں ہے رہبر

میں ڈو جگ تے ہاں اپنڑی اماں دا نوکر 

اے جگ ماں دے دم توں بہشتاں دی جا ہے

سید مرتضیٰ زمان گردیزی