پیو دی شان
ویلے ماڑے چنگے جیہڑا سدا نال کھلوندا اے
بے لوث سجن جگ تے بس باپ ہی ہوندا اے
گھربار چلاون لئی، کی کی نہیں کردا اے
سب دُکھ تکلیفاں نوں، ہس ہس کے جردا اے
لَکھ فکراں نے وِچ ذہنے، پر ہس کے وکھاؤندا اے
بے لوث سجن جگ تے، بس باپ ہی ہوندا اے
پھڑ انگلی بچیاں دی، باپ چلن دی مت دیندا
دے کے سمجھاں زمانے نال، سانوں رَلن دی مت دیندا
خود ڈھل کے بچیاں نوں اوہ جینا سکھاؤندا اے
بے لوث سجن جگ تے، بس باپ ہی ہوندا اے
پیسے نوں کماون لئی، نال موت دے کھیہ جاندا
ہر جِھڑک زمانے دی، روٹی لئی سہہ جاندا
سانوں خوشیاں دیون لئی، دُکھ اپنے لکاؤندا اے
بے لوث سجن جگ تے، بس باپ ہی ہوندا اے
باپاں نال ہمتاں نے، باپاں نال سُکھ ہوندے
ماں ٹھنڈی چھاں اے جے، پیو پھلویں رُکھ ہوندے
سر سایہ ایہنا دا، گھر سورگ بناؤندا اے
بے لوث سجن جگ تے، بس باپ ہی ہوندا اے
لِکھ سکدا نہیں کُجھ حاوی، گھٹ قلم دی سکت اے
زرا سمجھ تے سہی بندیا، کی باپ دی عظمت اے
رب شکلے آدم دی پہلاں باپ بناؤندا اے
بے لوث سجن جگ تے، بس باپ ہی ہوندا اے
طارق اقبال حاوی
No comments:
Post a Comment
Note: only a member of this blog may post a comment.