پینڈے
ہاڑ دے دِیہاڑے نیں تے تھلّاں دی دوپہر اے
واٹے واٹے کِتّے اِک راہی پیا جاندا اے
گرمی تے لُو بُری باب پئے کردے نیں
پیر جِتّھے دَھردا اے لُوسدے تے سَڑدے نیں
وَدھ کے ترامے نالوں رویں تَپّی ہوئی اے
او وی سگّوں اوہدے کولوں پچھانہہ پچھانہہ رہندا اے
اوس دے ای اولھے پیا لُک لُک بِہندا اے
رَبّ جانے کون اے تے کیہڑی تھاؤں آیا اے
ویلے سِر پجنے نُوں پندھ پیا وڈھدا اے
خورے سر پجنے نُوں پندھ پیا وڈھدااے
خورے کیہڑے وختاں نُوں ایس ویلے پھڑیا اے
ایہوا جیہے وِچ جیہڑا پینڈیاں چ وڑیا اے
ڈُونگھا ذرا سوچئے تے اَسّی اوہدے نال دے
پینڈیاں دے وِچ پئے عُمراں نُوں گالدے
پینڈے جیہناں پتا نہیں کدّوں کدّے مُکنا ایں
کدّوں جا کے وختاں دے مڑھکے نے سُکنا ایں
خورے کدّوں سُکھاں والا کوٹ کِتّے دِسنا ایں
منزلاں نے خورے کدّوں ساڈے اُتّے وسنا ایں
اَجّے تے نیں ہتّھوں دُور دُور پئیاں ہوندیاں
پَیراں دیاں چھالیاں نُوں سُولاں پئیاں ٹوہندیاں
واٹاں نیں اَجّے خورے کِنّیاں لمیریاں
اَک کے تے کئیں ڈھانڈے جاندے پئے ڈھیریاں
شریف کنجاہی
