کون ایہہ کھکھر چھیڑے
کاہنوں راہ جاندی نُوں تَکیں
کاہنوں آساں لائیں
گلیاں پیا گھسائیں
پھیرے پا پا تھکّیں
تُوں سوہنا
تُوں کرماں، بھاگاں والا
تُوں اُچیاں جاگاں والا
چَنّوں وَدھ کے رُوپ تیرے تے، میں جاناں میں منّاں
چرخے کتدِیاں کتدِیاں کردِیاں گلّاں تیرِیاں رَنّاں
دل تے میرا وی کردا اے، تینُوں ای پئی تَکّاں
نہ تَھکّاں، نہ اَکّاں
پر اَڑیا! ایس دُنیا دے وِچ پیار کمانا اوکھا
چُھپ چُھپ مِلنا
مِل مِل چُھپنا
تَکنا تے نہ تَکنا
گَل کردیاں وی جَھکنا
سَڑدِیاں رہنا، کُڑھدِیاں رہنا، مُوہوں بول نہ سَکنا
کون ایہہ گَل سیاپے پا لَے
ہاسے کھیڈے روگ لوائے
کون ایہہ پٹنے آپ سہیڑے
کون ایہہ کھکھر چھیڑے
شریف کنجاہی
