گوری وِینی ویکھیے تے ساوی ونگ ویکھیے
چھڈ کھیڑا چل سجناں دا رنگ ویکھیے
لوکی آکھدے نیں ماڑیاں دے بُوہے کوئی نہ
اَڈ جھولی اِس گلی وِچوں منگ ویکھیے
چارے پاسوں کنیں سسّی دیاں کُوکاں پیندیاں
جدوں اُوٹھاں والیاں دا کوئی سنگ ویکھیے
اینہاں اَکھاں اُتے دل ڈاہڈا تپا ہویا اے
دونواں ڈاہڈیاں دی پاسے بیہہ کے جنگ ویکھیے
ساہ، ناصرا ؔ!وے سُولاں اُتے ٹنگے ہوئے نیں
اینھاں اکھاں نوں وی سیخاں اتے ٹنگ ویکھیے
ناصر ملک
