سَیّو نی سَیّو
پیلی چنے دی تتلی
مارے پئی گگنیں اُڈاریاں وے ہو
لہندے دے پُھل کِھڑے
سرہوں دیاں ہون جِویں کیاریاں وے ہو
کچڑی جہی بولی اُتّے
نہاون پئیاں پھبنیاں کواریاں وے ہو
دُور کِتّے پنڈ دے نی
میرے چ ٹیٹیریاں
رون پئیاں کرماں نُوں ماریاں وے ہو
سَیّو نی سَیّو
بھنی پون وگیندڑی توں
لے دیو سگندھیاں اُدھاریاں وے ہو
مِلُّو گا جدوں مینُوں
سجن مینڈڑا نی
موڑ دیواں گی گِن گِن ساریاں وے ہو
سجناں تاں میرا اِک
گُھٹ کیوڑے دا
اکھیاں انگوری لوہڑے ماریاں وے ہو
سجناں تاں میرے دیاں
تھندیاں لٹوریاں نی
مہکاں دیاں بھریاں پٹاریاں وے ہو
ساون دیاں سدھراں
دے وانگ نی اوہ سانولا
دلاں دیاں کرے سرداریاں وے ہو
آتشی گلابی لکھاں
شاماں گلناریاں نی
ساں اوہدے مُکھڑے توں واریاں وے ہو
سَیّو نی سَیّو
نہ نی پُچھو اساں اوس باجھوں
کویں نیں ایہ عمراں گزاریاں وے ہو
اسیں اوس باجھوں سَیّو
اگ چ نہاتیاں ہاں
پھکیاں نیں منگیاں انگاریاں وے ہو
اساں اوس باجھوں سَیّو
خاک کر چھڈیاں نیں
دلے دیاں اُچیاں اٹاریاں وے ہو
اوس باجھوں پھٹ گیائے
رنگ ساڈے روپ دا نی
دغا کیتا سمے دے للاریاں وے ہو
پیا بھس ہوکیاں دا
مونہہ سانوں چمنے ا
برہوں سنگ لگیاں نیں یاریاں وے ہو
سَیّو نی سَیّو
پیلی چنے دی تتلی
مارے پئی گگنیں اُڈاریاں وے ہو
لہندے دیاں پتناں تے
تاریاں دے پُھل کِھڑے
سرہوں دیاں ہون جِویں کیاریاں وے ہو
شو کمار بٹالوی
