مینُوں تے میرے دوستا میرے غم نے ماریائے
ہے جُھوٹھ تیری دوستی دے دم نے ماریائے
مینُوں تے جیٹھ ہاڑ تے کوئی نہیں گِلہ
میرے چمن نُوں چیت دی شبنم نے ماریائے
مسیا دی کالی رات دا کوئی نہیں قصور
ساگر نُوں اوہدی اپنی پونم نے ماریائے
ایہہ کون ہے جو موت نوں بدنام کر رہیائے
انسان نُوں انسان دے جنم نے ماریائے
چڑھیا سی جہڑا سُورجا، ڈُبنا سی اوس ضرور
کوئی جُھوٹھ کہہ رہیا اے کہ پچھم نے ماریائے
منیا کہ مویاں مِتراں دا غم وی ماردائے
بوہتا پر دکھاوے دے ماتم نے ماریائے
قاتل کوئی دُشمن نہیں میں ٹھیک آکھداں
شِوؔ نوں تاں شِوؔ دے اپنے محرم نے ماریائے
شو کمار بٹالوی
