ولائتی اولاد
مَنتاں نیازاں نال منگِیاں اولاداں سَن
دل دِیاں رَبّ سانوں دِتیاں مُراداں سَن
انگلینڈ دے ماحول وِچ جیہڑے بچے پَل گئے
طور طریقے سَنگ گوریاں دے رَل گئے
حد نالوں وَدھ کُج لاڈ تے پیار سی
رنگ روپ کتنے بچیاں وٹا لئے
گوریاں دے وانگ کئیاں حُلیے بنا لئے
منہ زور ان مَن کنّاں وِچ بالیاں
دیندے ماں باپ نوں وی منہ اُتے گالیاں
پھردے بیکار ایویں کردے نیں چوریاں
ہر پُٹّھے کم وِچ کسراں نہ چھوڑیاں
نشے باز نشے وِچ ویچدے ڈرگ نیں
اگے پِچھے گھراں وِچ لائی جاندے اَگ نیں
بچے منہ زور ہو کے اپنی چلاندے نیں
ہتھ چُکو زرا تے پولیس نوں بلاندے نیں
نِکّے ہوندے بیویاں نیں بچے نوں وگاڑیا
جے خفا ہویا پیو بُڈھی اُنوں للکاریا
ہر ویلے بچے دے توں پِچھے پیا رہندا ایں
آپوں پاویں سارا دن باہر گیا رہندا ایں
کم اے نہ کاج اے تے ویہلا کھائی جاندا ایں
باہروں جدوں آندا ایں تے رُعب پائی جاندا ایں
جدوں بچے پڑھ لکھ کے شادی کر لیندے نیں
ماں پیو نوں چھڈ اوہ الگ جا کے رہندے نیں
عیداں شب براتاں بِنا منہ اوہ وکھاندے نئیں
بُڈھا بُڈھی کیہڑے حال پھیرا کدی پاندے نئیں
جمیا جنایا جنہاں بَن جاندے چور وے
ولائتی اولاد اُتے چلدا نہ زور وے
جلے بلے مائی باپ کہن بیٹھے اُٹھدے
پتہ ہوندا جمدے نُوں سُٹدے
لاڈاں تے پیاراں نال نِکّے جئے پالے سَن
بھیڑی اولاد لئی تے کِنے فکر جالے سَن
اُچیّاں امیداں لا کے کی اَساں کھٹیا
اس ولائتی اولاد نے تے تھاں مار سٹیا
بُڈھا بُڈھی فیر اکلّے روئی جان دھوئی جان
دن رات ہنجواں دے ہار وی پروئی جان
زخماں دے نال دل رہندا چُور چُور اے
جانے نہ صدیقؔ ایتھے کِدّا کی قصور اے
محمد صدیق میرپوری
No comments:
Post a Comment
Note: only a member of this blog may post a comment.