سجن کیہڑا دشمن کیہڑا اج نتارے ہوئے نے

سجن کِیہڑا، دُشمن کِیہڑا، اَج نتارے ہوئے نے

میرے چار چُوفیرے سپّاں پَھن کھلارے ہوئے نے

اَج کینویں دا ویلا آیا، لالی اُڈ گئی چہریاں دِی

اِنج لگدا جینویں سارے لوکی دُکھاں مارے ہوئے نے

سر نیزے تے ٹنگ کے، خورے کاہدا جشن مناندے رہے

اوہناں کی سِی جِتناں جیہڑے، ازلوں ہارے ہوئے نے

تُوں ٹُر پئی لے کے کَچیاں نُوں، ایہہ عشقاں نے مَت ماری

پَکے وِی ایس دُنیا تے، کدوں سہارے ہوئے نے

او کَردا حُسن تے مان بتیرا، کوئی پُچھے ایہہ گَل اوہدے کولوں

کِس دے لہُو دی سُرخی لے کے، ایہہ روپ نکھارے ہوئے نے

سانُوں دُوجا ساہ نئیں آؤناں، سارے ایہہ گَل کیہندے سَن

طارقؔ باہجوں دَسّو یارو! ہُنڑ کینویں گُزارے ہوئے نے

ڈاکٹر طارق سلیم