سب دے پتھر جھل ونجنڑاں ہے

سب دے پتھر جَھل ونجنڑاں ہے

اے نہ سمجھیں وَل ونجنڑاں ہے

تیڈی وَستی چھوڑ نہ ویساں

تیڈے شہر اِچ گَل ونجنڑاں ہے

موسٰیؑ وانگوں تیڈے شہر اِچ

اساں ای آخر پَل ونجنڑاں ہے

جیویں سَوکھے وقت گزر گِن

اے ویلا وی ٹَل ونجنڑاں ہے

عشق دے راہ تے ٹُردیں ٹُردیں

ننگے پیریں تَھل ونجنڑاں ہے

اصلوں میڈے ڈُکھ نہ سُنڑ تُوں

تیڈا جگرا ڈل ونجنڑاں ہے

تیڈی سوچ سُچیندیں ساحرؔ

چیتا جاہ توں ہَل ونجنڑاں ہے

ساحر رنگپوری