کُوک نی کڑئیے کُوک
تیری کِسے نہیں سننی ہْوک
کوئی آب آب کریندا مویا
ماں تتڑی نوں علم ناں ہویا
تُوں وی آب دا وِرد کرینی ایں
تیری کِسے نہیں سننی ہْوک
کُوک نی کڑئیے کُوک
دْکھ تے ہوندے ونڈن لِئی
جیہنوں سْن کے اندروں آہ نکلے
ایہہ کوئی سہانا گیت نہیں
جیہنوں سْن کے اندروں واہ نکلے
تُوں ٹُھوٹھا پَھڑ کے
واہ واہ منگدی پھرنی ایں
تیری کِسے نہیں سننی ہْوک
کُوک نی کڑئیے کُوک
دْکھ تے پھولن مانواں دھیئاں
پیڑاں ونڈن کد مترئیاں
گَل نوں آؤندیاں ٹْٹیاں باہواں
کیوں غیراں اَگے رونی ایں
کیوں موتی ہنجواں ہانواں دے
پئی منج دے وِچ پرونی ایں
تیری کِسے نہیں سننی ہْوک
کُوک نی کڑئیے کُوک
سید آصف شاہکارؔ
No comments:
Post a Comment
Note: only a member of this blog may post a comment.