پیار دی دُوجی واری
اِک رِشتہ جو
کِسے صوفی دی کافی
جادو بَھریا
پیار دی مِٹّھی مِٹّھی نگھ
تے سبھ کُجھ سی
اِک دن مُک گیا
اِنج لگیا جیویں دُنیا مُک گئی
پِیڑاں دی اِک لال ہنیری جُھلی
رات دی بُکل مار کے پت چھڑ
ساڈے ویہڑے وڑ پئی
فر ویلے دِیاں لوڑاں
سبھ یاداں نُوں
دِل دے ڈُوہنگھے ساگر دے پاتال وِچ دَبیا
آپنی لاش نُوں آپنیاں موڈھیاں اُتے چُک کے پِھریا
ورھے اِک دُوجے دی چُوک نُوں پھڑ کے
اَگڑ پِچھڑ لنگھدے گئے
فِر اِک انہونی ہوئی
تیرا پیار سُنیہا آیا
رُت بہار دی کِھڑی سویر نُوں لے کے آ گئی
سبھ پرانیاں مُورتاں اُتوں گھٹا جھڑ گیا
اَج فِر
صوفی دی کافی دے بول سُنے
فِر پرانا جادو جاگیا
حُسن جوانی چڑھیا
اِک نشّہ رگّاں وِچ دوڑیا
پیار دی دُوجی واری
تینُوں پیار کرن دی واری
ہے انوکھی
پر سچ اے
سید آصف شاہکارؔ
No comments:
Post a Comment
Note: only a member of this blog may post a comment.