پتہ مصنف
پہلے نام اللہ دا لئیے، پالنہار جو سب دا
پھر درود نبی سرورؐ تے، ہے غمخوار جو سب دا
پتہ میں اپنا دَسّاں یارو! دل وچ آیا خیال
انڈیا وچ میں پیدا ہویا 19 سو انتالیسواں سال
اوہو پنڈ میرا سی جتھے ہوئے غلام رسول
یوسفؑ زلیخاں لکھی جنہاں نے ہوئی بڑی مقبول
عالم پور کوٹے انڈیا دے وچ ساڈا سی مکان
سن سنتالی ہجرت کر کے، آ گئے پاکستان
ہُن میں ٹُوبے لاگے یارو! لایا آ کے ڈیرا
تِن سو بیاسی جلالپور سوہناں پنڈ ہے میرا
جلالپوروں نِت ٹُوبے جا کے کراں میں کاروبار
ڈاکٹر نصیر دے کلینک اگے کھوکھا رکھیا یار
اک دن وی میں جا سکولے پڑھیا نہ کجھ بھائی
پڑھیا پاک قرآن میں سوہناں رحمت رب دی آئی
نور عالمؔ ان پڑھ ہے یارو ہُندے لوک حیران
نبیؐ دے صدقے لکھنا آیا، میں رب دے قربان
بڑے بڑے عِلماں والے مینوں دَین پئے داد
میری دعا ہے اللہ اگے رکھے سب نوں شاد
میرے مولیٰ سب دے اُتے رحمت اپنی کر دے
جو کجھ منگدے تیرے کولوں سَب دی جھولی بھر دے
میرے بچے بچیاں سارے ہیگے خدمتگار
میری دعا ہے راضی اناں نوں رکھے رب غفار
میرے یاراں بیلیاں تائیں رکھیں مولیٰ شاد
میرے رشتے داراں تائیں رکھیو شاد آباد
نورعالم ہوشیارپوری
