رب تے رسولؐ دا ہی یار ہونا چاہی دا
جیہڑا دونویں چاؤہندے کردار ہونا چاہی دا
سوہنےؐ لئ جیواں گے تے سوہنےؐ لئ مراں گے
پکا سچا قول تے قرار ہونا چاہی دا
کناں چہ صحابیاںؓ دے کہندے جبریلؑ سن
سوہنےؐ دیاں نیناں وچوں چلیا جو نور دا
تیر ساڈے دلاں وچوں پار ہونا چاہی دا
ہوکے جدوں بھراں گل آقاؐ تائیں پہنچ جائے
دل والا ایہو جیہا تار ہونا چاہی دا
سچا اے غلام نئیوں کھوٹ دا اے ماریا
ایہدے لئی ویری سنسار ہونا چاہی دا
اکھیاں جے چاؤہندیاں نیں دید سرکارؐ دی
جِیب تے دروداں دا شنگار ہونا چاہی دا
جیہڑا سُنگھے آوے اوہنوں مہک سرکارؐ دی
ایہو جئیا مدینے والا ہار ہونا چاہی دا
جِویں اک کہفؓ دا سی آپؐ دا غلام ہاں
کتیاں چ میرا وی شمار ہونا چاہی دا
اکھیاں دا نور دیواں مکھڑا وکھاؤن جے
چاہواں لئی دل نوں تیار ہونا چاہی دا
یاد آوے آقاؐ دی تے رُوح کِھڑ جاندی اے
ساہواں نوں وی سجری بہار ہونا چاہی دا
تکدے ہی بھل جاواں اپنی میں ذات نوں
آقاؐ دے پیار دا خمار ہونا چاہی دا
رہوے نہ منیرؔ کوئی شک وی نجات دا
نبیؐ دا غلام سرشار ہونا چاہی دا
ارشد منیر
No comments:
Post a Comment
Note: only a member of this blog may post a comment.