ہن کس تھیں آپ چھپائی دا

 ہُن کس تِھیں آپ چھپائی دا

کِتے مُلّاں ہو بُلیندے ہو، کِتے سُنت فرض دسیندے ہو 

کِتے رام دُہائی دیندے ہو، کِتے متھے تلک لگائی دا

 ہُن کس تِھیں آپ چھپائی دا

میں میری ہے کہ تیری ہے، ایہہ انت بھسم دی ڈھیری ہے 

ایہہ ڈھیری پیا نے گھیری ہے، ڈھیری نوں ناچ نچائی دا

 ہُن کس تِھیں آپ چھپائی دا

کِتے بے سر چوڑاں پاؤ گے، کِتے جوڑ انسان ہنڈھاؤ گے 

کتے آدمؑ حوّا بن آؤ گے، کدی میتھوں وی بھل جائی دا 

 ہُن کس تِھیں آپ چھپائی دا

باہر ظاہر ڈیرہ پائیو، آپے ڈھوں ڈھوں ڈھول بجائیو 

جگ تے اپنا آپ جتائیو، پھر عبدل دے گھر دھائی دا 

 ہُن کس تِھیں آپ چھپائی دا

جو بھال تساڈی کردا ہے، موئیاں توں اگے مردا ہے 

اوہ موئیاں وی تیتھوں ڈردا ہے، مت موئیاں نوں مار کہائی دا

 ہُن کس تِھیں آپ چھپائی دا

بندرابن میں گٔوآں چراوے، لنکا چڑھ کے ناد وجاوے 

مکے دا بن حاجی آوے، واہ واہ رنگ وٹائی دا  

 ہُن کس تِھیں آپ چھپائی دا

منصور تُساں تے آیا اے، تُساں سُولی پکڑ چڑھایا اے 

میرا بھائی بابل جایا اے، دئیو خون بہا میرے بھائی دا 

 ہُن کس تِھیں آپ چھپائی دا

تسیں سبھنیں بھیسیں تھیندے ہو، آپے مد آپے پیندے ہو 

مینوں ہر جا تُسیں دسیندے ہو، آپے آپ کو آپ چکائی دا 

 ہُن کس تِھیں آپ چھپائی دا

ہُن پاس تساڈے وسّاں گی، نہ بے دل ہو کے نسّاں گی 

سبھ بھیت تساڈے دسّاں گی، کیوں مینوں انگ نہ لائی دا 

 ہُن کس تِھیں آپ چھپائی دا

واہ جس پر کرم اویہا ہے، تحقیق اوہ وی تیں جیہا ہے 

سچ صحیح روایت ایہا ہے، تیری نظر مہر تر جائیدا ۔

ہن کس تھیں آپ چھپائیدا ۔

وچ بھانبڑ باغ لوائیدا، جہڑا وچوں آپ وکھائی دا 

جاں الفوں عہد بنائی دا، تاں باطن کیا بتلائی دا 

 ہُن کس تِھیں آپ چھپائی دا

بیلی ﷲ والی مالک ہو، تسیں آپے اپنے سالک ہو 

آپے خلقت، آپ خالق ہو، آپے امر معروف کرائی دا 

 ہُن کس تِھیں آپ چھپائی دا

کدھرے چور ہو کدھرے قاضی ہو، کتے ممبر تے بہہ وعظی ہو 

کتے تیغ بہادر غازی ہو، آپے اپنا کٹک چڑھائی دا 

 ہُن کس تِھیں آپ چھپائی دا

آپے یوسفؑ قید کرائیو، یونسؑ مچھلی توں نگلائیو 

صابرؑ کیڑے گھت بہائیو، پھیر اوہناں تخت چڑھائی دا 

 ہُن کس تِھیں آپ چھپائی دا

بلھا شوہ ہُن صحیح سنجاتے ہو، ہر صورت نال پچھاتے ہو 

کِتے آتے ہو کِتے جاتے ہو، ہُن میتھوں بھل نہ جائی دا

 ہُن کس تِھیں آپ چھپائی دا

بابا بلھے شاہ