عشق دی نویوں نویں بہار
جاں میں سبق عشق دا پڑھیا
مسجد کولوں جیوڑا ڈریا
ڈیرے جا ٹھاکر دے وڑیا
جتھے وجدے ناد ہزار
جاں میں رمز عشق دی پائی
مینا طوطا مار گوائی
اندر باہر ہوئی صفائی
جت ول ویکھاں یار و یار
عشق دی نویوں نویں بہار
ہیر رانجھے دے ہو گئے میلے
بُھلی ہیر ڈھوڈیندی بیلے
رانجھا یار بُکل وچ کھیلے
مینوں سُدھ رہی نہ سار
عشق دی نویوں نویں بہار
وید قرآناں پڑھ پڑھ تھکے
سجدے کردیاں گھس گئے متھے
نہ رب تیرتھ، نہ رب مکے
جس پایا تس نُور انوار
عشق دی نویوں نویں بہار
پُھوک مصلّیٰ، بَھن سٹ لوٹا
نہ پھڑ تسبیح عاصا سوٹا
عاشق کہندے دے دے ہوکا
ترک حلالوں کھا مُردار
عشق دی نویوں نویں بہار
عمر گوائی وچ مسِیتی
اندر بھریا نال پلیتی
کدے نماز توحید نہ نیتی
ہُن کیہ کرنائیں شور پُکار
عشق دی نویوں نویں بہار
عشق بُھلایا سجدہ تیرا
ہُن کیوں اینویں پاویں جھیڑا
بلھا ہوندا چُپ بتیرا
عشق کریندا مار و مار
عشق دی نویوں نویں بہار
بابا بلھے شاہ
