سانُوں کی
عیداں ہَووَن یا شبراتاں، سانُوں کی
چَھڈّو جی ایہہ گَلاّں باتاں سانُوں کی
دَسَّو کاہدے نال منائیے عِیداں نُوں
کیہڑی خُوشی چہ نغمے گائیے عِیداں نُوں
کِتھَّوں پَائیے پِیئے کھائیے عِیداں نُوں
چَاہڑن دیگاں بھرن پراتاں، سانُوں کی
چَھڈّو جی ایہہ گَلاّں باتاں سانُوں کی
باہر دیاں جے ایڈاں نیں تے وَڈیاں لئی
مُلک دیاں جے بھیڈاں نیں تے وَڈیاں لئی
پُٹھّیاں سِدّیاں کھیڈاں نیں تے وَڈیاں لئی
لیبر دیاں پریڈاں نیں تے وَڈیاں لئی
وَڈیاں لئی نیں رُو رعائتاں، سانُوں کی
چَھڈّو جی ایہہ گَلاّں باتاں سانُوں کی
مانن بنگلے باراں دریاں سانُوں کی
وَرتن چِیزاں کھریاں کھریاں سانُوں کی
پہنن پَٹ، ہنڈاون زَریاں سانُوں کی
ڈیناں بَنڑ بَنڑ بیٹھن پَریاں سانُوں کی
بھانویں بَاندر پَون بَناتاں سانُوں کی
چَھڈّو جی ایہہ گَلاّں باتاں سانُوں کی
پھِردے کاراں تَے امپورٹر موجاں نال
چور سمگلر جُھوٹن موٹر موجاں نال
کَرن اٹینڈ کلباں ہوٹر موجاں نال
ڈِھڈل موٹُو گنجے ٹوٹر موجاں نال
دِنّے دوپہرے مانن راتاں سانُوں کی
چَھڈّو جی ایہہ گَلاّں باتاں سانُوں کی
گَلاّں باتاں نال عبیراؔ فیدہ کی
وَگدے ہوئے ناسُور تے چِیرا فیدہ کی
دَسّن نال سٹور ذخیرہ فیدہ کی
اَنھیاں اکھّاں وِچ ممیرہ فیدہ کی
مُردہ ہُندیاں جان حیاتاں سانُوں کی
چَھڈّو جی ایہہ گَلاّں باتاں سانُوں کی
عبیر ابوذری
