میڈا مُلک تیڈی آزادی توں
میڈی ذات کوں کئی انکار نئیں
توں زندہ ہئیں، میں زندہ ہاں
کئی بحث نئیں، تکرار نئیں
تیڈا پرچم چندر ستارے دا
اظہار تیڈی پہچان دا ہے
تیڈا پرچم تیڈی پارت ہے
تیڈی پارت جُز ایمان دا ہے
تیڈی سرحد ساہ دی سرحد ہے
ہے گال سِدھی سِدھ واٹے دی
نہ آوی اوکھ، جے آوی تاں
تیڈا صدقہ ہے رت گاٹے دی
جیڑھا تئیں ڈو بھینگی اکھ ڈیکھے
او موت دا ذائقہ چکھ ڈیکھے
بے دین لعین دی کیا جرات
پیر سرحد پاک تے رکھ ڈیکھے
میں شاعر خوش الحان تیڈا
نہیں سہہ سگدا نقصان تیڈا
تیڈا ہونونڑ میڈا ہونونڑ ہے
ہے صدقہ میڈی جان تیڈا
مُصطفٰی خادمؔ
No comments:
Post a Comment
Note: only a member of this blog may post a comment.