جدید پنجابی شاعری
اُتوں بیبا کنی سوہنی شکل سجائی پھرنا ایں
وچوں دل دے شیشے اُتے کالک لائی پھرنا ایں
خود غرضی تے نفس پرستی ایہ دو وڈیاں مرضاں نیں
ایہ دوویں نے تنیوں لگیاں حرص ودھائی پھرنا ایں
دل بیتُ اللہ دے وچ ہر دم حرص وچھیرے نچدے نیں
گل چولا ہتھ تسبیح تے درویش سدائی پھرنا ایں
رب ہر ویلے تیرے اُتے رحمت کرنی چاہندا اے
پر تُوں آپے اپنے اُتے ظُلم کمائی پھرنا ایں
لوکاں نُوں نت متیں دے دے دس کیہ تینوں لبھیا اے
اپنے آپ نُوں مت نہ دیویں وعظ سُنائی پھرنا ایں
دردی دنیا دے وچ آ کے اپنا آپ پچھاتا ناں
مذہباں، قوماں، فرقیاں دے وچ عُمر گوائی پھرنا ایں
؟؟؟؟؟
No comments:
Post a Comment
Note: only a member of this blog may post a comment.